لو انته بمكاني .. جان شسويت ؟؟؟

[البغدادي36]

طبعا هذا الموضوع .. نشرته في بدايه انضمامي لعيون العراق

طبعا اندهشت من مشاركات الاعضاء والمشرفين .. وتفاعلهم الجميل ويايه

خلاني احس بانفراج وانشراح نفسي .. والحمد لله


اليوم اريد اعيد هذا الموضوع لسببين :

الاول : انه قضيتي بعد ما انحلت ..

الثاني: اريد اخذ ارائكم من جديد . لان عندي كل الثقه بيكم ..

........................................


عدي موضوع مهم رايد اخذ رايكم بي ...
الرسالة موجهه الى بنات وشباب المنتدى..
وارجو ان تجاوبوني بصراحة..
اني جنت مرتبط مع بنيه بالموصل .. واني اكيد ببغداد ..
وبعد ما كملت الاعدادية .. طلع قبولي ببغداد.. بكلية الهندسه
واصريت رغم الحاح اهلي وبالخص ابويه الشديد.. بأن اداوم في جامعه الموصل
وطبعا اهلي ما جانو يعرفون بالشغلة.. اقصد بالبنيه اللي ارد اروح للموصل على مودها
بس اني استبديت برأيي.. ورحت للموصل وداومت هناك..
وتحملت الاقسام الداخلية...
والمشقة
والخطر
وعفت اهلي
ومنطقتي
واصدقائي
والسيارة اللي انطانياها الوالد على اساس اداوم بيها
والمصاريف
بس لخاطر عيون حبيبة روحي .. شهد
المهم
هيه طلع قبوله بجامعه الكوفه
فكلتلها راح اتحمل هالسنه .. على اساس تنقل للموصل بالعام القادم
وتحملت.. ورضيت.. بالامر الواقع
وكلت ميخالف ...
كلشي يهون لخاطر شوشو
انشالله سنة الجايه نمشي سويه... وايد بأيد
وكل احلامي الورديه راح تتحق
........
بس مع الاسف....
كل هاي الاحلام تبددت بدقيقه ونص...
اللي هيه طول اخر مكالمه مع شهد
اللي كالتلي بيها
حمودي... ارد احجي وياك بموضوع مهم....علاقتي وياك اعتبرها انتهت.... انته انسان مو طبيعي ... وماكو منك بالدنيا اثنين والله العظيم . بس اني وياك ما نكدر نكمل بعد.... ارجوك تعذرني وتتفهم موقفي ... ما اكدر اشرحلك الاسباب... ...... اتمنالك كل الخير
واني بصراحه خسرتك ... موانته اللي خسرتني
اني راح اكسر السيم كارت وره ما اكمل هاي المكالمه وياك
اني اتوسلت بيها .. وكتلها .. ارجوج بس انطيني اي سبب

شهد ....اني احمد ..
اني اكدر اساعدج .. اسوي كلشي تريديه .. بس سولفيلي..
....................
كالت ... اسفه ما راح ادوخك.. اترجاك تنساني
اني بصراحه انصدمت.. ووما حجيت ولا كلمة ..... بس ... ما كدرت اتحمل هيج موقف ... وكمت ابجي وسديت التلفون
مضى على هذا الحجي حوالي سنه... ولحد هسه بعدني ما اكدر اتجاوز الموضوع
بصراحه اني حبيت شهد
وتدرون....... لحد هسه بعدني احبهه
كمت ... اجذب على روحي ... واكول باجر راح اشوفها
او هسه راح تتصل ...
وعايش بحاله غريبه من ذاك اليوم
وفشلت بتكوين اي علاقه جديده.. بجامعه الموصل
كمت اعاني من الاكتأأب..... وتغيرت اطباعي وتصرفاتي
ووضعي هسه مخربط وما اعرف شسوي
ارجوكم ساعدوني
وانطوني اراكم

[.+*+.FLoWeR.+*+.]

اهنيك أخي العزيز البغدادي على جرأتك في الطرح..
موضوع محزن للأسف..

أخي العزيز كل انسان يمر بموقف بالدنيا يحزنه أو يفرحه..ومحد راح يعيش الا ولازم يذوق الحلو والمر..
وبالمقابل الله عطانا نعمة حلوة نقدر نواجه مر هالدنيا..وهي نعمة النسيان!
وأكيد هالشي صعب بالبداية بس مع الايام راح تتأقلم مع الوضع الجديد..
وأكيد النسيان ماراح يكون خلال يوم وليلة ..مثل ما خذيت وقت في حبها راح تاخذ وقت في نسيانها..
وراح تمر بلحضات تتذكر فيها كل الكلام اللي قلتوه وكل المواقف اللي مريتوا بيها ...بس بعدين راح يصير مجرد ذكرى حلوة

والبنت ما نقدر نحكم على موقفها لأن ماذكرت الاسباب..يمكن سبب قوي عندها اللي خلاها تتخلى..
وهم الله عطى الانسان طيبة القلب والتسامح..وتقدر تعذرها

أخي العزيز..الدنيا تجارب..وكل واحد بياخذ حقة من كل تجربة..
وكل شي قضاء وقدر وقسمة ونصيب
واعتبر الشي اللي صار خيره من الله

أطيب تحية

[جرح الحبيب]

حبيبي احمد .
السلام عليكم
احب اكولك انت مو اول واحد يمر بهذا الموقف الكثير منا مر وسوف يمر به لكن بطرق مختلفه
حبيبي احمد مريت بمثل موقفك واحس بشعورك وبكل لحظه تمر عليك.
لكن اني حاولت اتجاوز هذا الموضوع بطريقه وانشاء الله تكون ناجحه وانصحك بيه .
اكيد اتعرفت بالجامعه او بمكان ثاني حسب تواجدك .
اني انصحك ان تكون علاقه ويه البنت الي قلبك ينجذب اله وحاول اتحبه اذا حبتك وحاول ان تنسه تفكيرك بحبيبتك الاولى ولو هذا الشي مستحيل لكن اقنع روح بأنك نسيتهه وحبيت هذه الفتاة الي يمك وحاول توفي بحبك اله . وره فتره راح تلكه نفسك صدك حبيته وتكدر تتخطه ازمتك الي انت بيه .
لكن اكول شغله ولو هيه متساعدك لكن اذا حبيتهه صدك مراح تنساها لكن الحب الثاني راح يخفف تفكيرك واشتياقك الهه . متأكد ميه بلميه من هذا الشي .
وانشاء الله تتوفق .

مع خالص حبي واحترامي لك
اخوك
(( علــــــ الياسري ــــــي ))

[البغدادي36]

اختي الغااااااااااليه على قلبي
q8yq

اخويه وحبيبي
علاوي

شكرا على مروركم العطر
فرحتوني بمشاركتكم والله


تحياااااااتي الخااااااالصه


.........

[سنفورة]

مرحبا اخويه احمد
بصرحه اني البارحه قريت موضوعك بس اليوم يلا راح ارد عليه
وطبعا قريت ردود الاعظاء الي قبلي وكلامهم صحيح
هي هيج الدنيا بيها لحظات حلوة وبيها لحظات حزينة بس مهم ان تعلم من تجاربنا ونستفاد منها
حتى نكمل حياتنا.
طبعا الموقف الي مريت انت بي موقف صعب والنسيان اصعب مناومنكدر نلوم البنيه
على هذا الشي لان منعرف شنو السبب لان مرات اكو ظروف تخلي الانسان يسوي اشياء غصبن
عنه يعني تكون ظروفه اقوى منا ويجوز هي جان عدها ظروف خلتها هيج تسوي الله واعلم
وهم ميصير تظل عايش اسير الماضي او تفكر بشي راح اذا انته جري سوي اول خطوة حتى تتخلص من هاي
الحاله بدل كل ارقام تلفوناتك,حتى لاتظل عايش على امل لو يصير اولا وهو ان تتصل بيك.
وثاني شي هم حاول انو تسوي نقل ليغداد وترجع يم اهلك واصدقائك ونصيحة انت لازم تكون اتعلمت من هاي التجربه
انو لا تربط مستقبلك باحد مهما يكون لان احتمال تخسر هذا الشخص وتخسر المستقبل هم
يعني انو انت من طلع قبولك بغداد انت رحت للموصل وبصراحه هذا غلط.
وان شالله تعيش حياة جديده وتتعرف على ناس وتعيش حب جديد.
اخويه احمد الحياة حلوة وحرامات نكظيها حزينين على شي راح .
بالنهايه تقبل تحياتي ومروري وان شالله بالتوفيق اتمنالك حياة سعيده
مودتي

[البغدادي36]

اول شي احب اشكرج هواي .. على صراحتج .. وكلامج الحلو
بس المشكله انه واحد يوصل المرحله اللي يكون مستعد بيها يسوي اي شي لخاطر حبيبه
وبعدين .. تنقلب كل الامور وهيج يصير بي .. وما يطلع شي بيده انه يسوي اي شي ..
بصراحه ما اعرف شكول ..
بس هيه على الاقل لو تخابرني وتنطيني سبب مقنع .. جان هواي ارتاحيت
حتى لو كان هذا متعلق بماضيها .. يعني يجوز اكو شي جانت تخفيه عني
هسه حتى لو انخطبت .. او حتى اتزوجت
عادي .. اكدر اتفهم .. واخلص نفسي من جزء كبير من هذا الهم الشايله على راسي
ثاني شي .. اني بصراحه مو مال بنات ؟؟؟ هههههه
حتى هيه اللي بدت ويايه العلاقه .. بس حبيتهه من صدك .. وما متندم على هذا الشي
بس ..؟؟؟

[أمرأة من زئبق]

اخي الغالي البغدادي ....
من الجميل في الموضوع انك كتبت معاناتك
وكتبت القصة بتفاصيلها
وهذا اهم مافي القضية
عندما تذهب لطبيب نفساني اهم فقرة انك تتكلم عن مشكلتك
وبما انك استطعت ان تتكلم فاعتبر انك قد وصلت في الحل الى منتصف الطريق

اخي العزيز

عندما قرات مشكلتك لم استغرب ولم اتعجب من حال الدنيا والى ماذا وصل بنا الامر
قد ذقت من مرارة وحقارة بني البشر ما يكفيني

دعني اخبرك بشيء

ضع نفسك وكرامتك نصب عينيك
ضع في راسك ان في جامعتها احد استطاع ان يمتلك عقلها وقلبها
ضع في راسك ان الله يقسم للانسان ما يشاء
فان كانت لك فلن يقدر اي قوى على تفريقكما
والعكس بالعكس

هل تعلم مالذي احبه في الحياة
هناك حكمة اعشقها للغاية

( ان احببت شيء بشدة فاطلق سراحه فان عاد اليك فهو ملكك للابد وان رحل فهو ليس ملكك )
ضع هذه الحكمة نصب عينيك
وتذكر قول الله عز وجل ( وعسى ان تكرهوا شيئا وهو خير لكم )

اعذرني ع الاطالة
لكن حاول ان تخرج من دائرة حزنك
انظر للحياة وفي نفسك امل ان غدا يوم جديد
افتح قلبك وعينك للانسانة الجديدة
ضع في نفسك انك في طور البحث عن البديل الافضل
حينها ستجدها ان شاء الله

لكن اهم شيء تقرر انك ستبحث عن الحب الجديد

[فرفورا]

اخوية العزيز
احب ان اقدملك نصيحة اعتبرها من اختك الصغيرة ان شاءالله تفيدك
الي نساك انساه
ولا تفكر بوحدة لعبت بمشاعرك.. اكو ناس مع احترامي ميستاهلون احد يدمر حياته علمودهم
واني مقدرة موقفك والحالة الي انت بيها
حاول تنسى مااكولك بحب جديد لاكن بتغيير شلات بحياتك
اشتغل ونس روحك انسى همك
عيش حياتك طبيعية
حاول مرة مرتين عشرة مليون
لازم بالخير راح تكدر تتغلب على حالة الاكتئاب الي عندك

تحياتي الك واهنيك على صراحتك

[¶Ξ……Ξღحسينـ اَلرساَمღΞ…ـ…Ξ¶]

السلام عليكم ورحمه الله وبركاته



اخي لعزيز اجمل مافي الحب
عذابه

وعله كولت ياس خضر
حلات لحب عذابه
بس انته عافتك
اوكي
وانته لحد هسه تحبه وهسه تخابر وهسه شسمه بس باوع
مراح اكلك انساه وشسمه لا

بس اله انطانه نعمة نسيان
وثاني شي انته هسه مراح تنساه بس بمرور الايام راح تنسه

ولو اني افضل متنساه لئن انته مسودن بيه
ويمكن جان حبك حلو بس شسوي

تره اخوك نفس حالتك بضبط بس اجذب عله روحي واكول انسه
بس نسيت اهواي شغلات وذكرني اهوي شغلات بيه

بس لحل بمرور الايام راح تنساه

تحياتي

[عاشقة تامر]

قصتك رهيبه فعلا بس اكيد صاير فد شي وخلاها تعوفك اني كلش متفهمه وضعك لان اصعب شي الفراق وانت بعدك مدتعرف شنو السبب حتى منكدر نظلمها يجوز صارلها فد شي جبرها تعوفك او يجوز هي الي رادت هل شي ونصيحتي الك مادام هي عافتك انتي هم عوفها اتحدى نفسك ولتفكر بيها حاول تنساها لان هذا حلك الوحيد ولازم تحاول تنساها وكل شي قسمه اذا الله راد ترجعلك فحترجعلك لو بعد 10 سنوات واذا الله مراد فمراح ترجعلك ابد انت وكل امرك لربك والله كريم

تحياتي

[البغدادي36]

مشكورين على ردودكم القيمه .. تحياتي حبايبي
فرحتوني بردودكم الاكثر من رائعه
ونصائحكم الاخويه .......... اشكركم جدا
والله كريم

[ameer2022]

ألي هواك أهواه
وألي نساك أنساه!!!
هذا الشعار ألي رفعتة من صار بيه نفس موقفك تقريباً
بس أني البنية شرحتلي موقفها وأني أتفهمت(غصباً علية طبعًا)
وأتمنيتلها الخير من كل قلبي
وراح يصيرلي أكثر من سنتين بدونها
بس أتعودت
تقبل مروري

[أميرة الرومانسية]

اخي العزيز يعني اي عنوان الها ماعندك او تعرف احد اقاربها
ممكن يوصلك الهااو تروحلها للجامعه الي اداوم بيها حتى تفهم شنو السبب الي خلاها تتصرف وياك بهذا الشكل
وبهيج تنتهي معاناتك بمعرفتك للسبب الحقيقي
وبالاخير احب اكولك شي مهم الي باعك بيعه . والي ميستاهلك لاتفكر بيه لان انت هسه عايش بدوامه احزانك في حين البنت عايشه حياتها وماشيه امورها فحزك على شي كان بالماضي مو حل الحل انك تستفيد بتجربتك الجايه
وان شاء الله اكون ساعدتك ولو بشي بسيط


يــادفـتـــر الــتــذكـــــار يــلـــي حــروفــــك نـــــار
مــرة أعـشـقـك سكــة ومــرة أكـرهـك تـذكــــار
ض102حب العراق يجري في دمي

[البغدادي36]

مشكور حبي اموري على مشاركتك الطيبه ..

. تحيااااااااتي

[البغدادي36]

اخي العزيز يعني اي عنوان الها ماعندك او تعرف احد اقاربها
ممكن يوصلك الهااو تروحلها للجامعه الي اداوم بيها حتى تفهم شنو السبب الي خلاها تتصرف وياك بهذا الشكل
وبهيج تنتهي معاناتك بمعرفتك للسبب الحقيقي
وبالاخير احب اكولك شي مهم الي باعك بيعه . والي ميستاهلك لاتفكر بيه لان انت هسه عايش بدوامه احزانك في حين البنت عايشه حياتها وماشيه امورها فحزك على شي كان بالماضي مو حل الحل انك تستفيد بتجربتك الجايه
وان شاء الله اكون ساعدتك ولو بشي بسيط


يــادفـتـــر الــتــذكـــــار يــلـــي حــروفــــك نـــــار
مــرة أعـشـقـك سكــة ومــرة أكـرهـك تـذكــــار
ض102حب العراق يجري في دمي




شكرا على مشاركتج الجميله اختي العزيزه

بصراحه اني حاليا مع افكر انه اعرف عنها شي ..

لان تعبت .. تعبت حيل واني افكر بيها .. اني اعرف انه ما راح اكدر انساها .. لانها كانت الاولى
وجنت اتمنى تكون الاخيره ..
اتمنى الكى اللي تعوضني هذا الفراغ الهائل .. وتعوضني الفاتني .. هذا كل اللي احتاجه
والله كريم

[malak_peko]

قصتك محزنة



اني برأيي

انو ترجع لاهلك وخلي تولي هي

الللي باعك بيعة

[صقر الاعظميه]

قصتك محزنة




اني برأيي

انو ترجع لاهلك وخلي تولي هي


الللي باعك بيعة

والله عمي
عاشت ايدج على هذا الرد

[احلى زوزو]

اوووووووووووووف اخويه والله بجيتني

قصتك مأساه

انته خوش ولد وطيب ووفي

بس هم متعرف ظروف البنت يعني شعدهه؟

اتمنالك كل خير
والله بعد ما اسيطر ع روحي

تقبل مروري

[قمر بغداد الاول]

السلام عليكم
اخي احمد لاول مره ادخل على موضوعك وتاثرة بيه كثيرا من خلال صدقك ووفائك نادر الوجود بين الناس
ولكن اخي العزيز الحياة تطلب منك الاستمرار والحمد لله انته حبيت وانته في صغر سنك يعني الحياة طويله امامك ولا تفقد الامل قد ياتي زمان يعوضك الله بما فقة من الحب والله الاعلم لا نستطع ان نتكلم على البنت ونحن صيام قد تكون مساله اظطرته الى تركك واخي العزيز في هذا الزمان البنات والشباب يمرون بهذه الحاله والله العظيم واخذه مني هذه الكلمه بس المشكله الشخص اشلون يتجاوز هذا الالم الله يعوضك ولكل حب لها تجارب وعبر لك مني اخي العزيز ان لا تسلم قلبك كله الى الشخص لان في النهايه انته الي تتاذه مو غيرك اسال المجرب اخي العزيز .........تحياتي والله ينسيك

قمر بغداد الاول

[احلى زوزو]

بس سؤال؟

اخاف الحب يلازم الانسان ع طول الحياه؟

[ALI TURKMAN OGLU]

شكرا اخوي البغدادي على صراحتك
والله يساعدك على المأساة التي تعيش بيهة
اخوي اني اكول ان الحل لمشكلتك تنقل لبغداد لان بغداد احلى من كل مكان وترجع بنص اهلك واصدقائك وترتاح من مذلة الاقسام الداخلية والسفر والوضع هسة من تنقل راح تشوف الفرق بين الدوام بغداد والدوام بالموصل وابدي بداية جديدة وتعرف على اصدقاء وصديقات جدد وتنسة الحب القديم والي ميريدك لاتريدة وحاول تعيش فترة الكلية لان هاي احلة مرحلة بحياتك لاتكضيهة هم وحزن وقهر....
وشوف من تكون فريييييييي اشكد حلو ماعندك اي شي وحدك بالساحة لاحب لا كبد ولاهم يحزنون
مع تحياتي لك اخوك ALI TURKMAN OGLU

[احلى زوزو]

البغداي شصار بيك؟؟؟
ديلا بس طمنهـــ

[البغدادي36]

السلام عليكم
مشكورين على ردودكم الرائعه اللي بينتلي معادنكم الاصيله

انتو اعز الناس الي بهاي الدنيا ..
فرحتوني بردودكم ونصائحكم وتفاعلكم مع الموضوع

اشكركم من كل قلبي
..

[a7medsalim]

اقرا الموضوع وارد لان الكهرباء انكطعت حبي